Tha Fèis Fiadh-bheatha nan Eilean a’ tilleadh ann an 2026: seo mar a ghabhas tu pàirt

Tha clàradh thachartasan do dh’Fhèis 2026 a-nis fosgailte agus thathar a’ gabhail ri iarrtasan airson an dà thaisbeanadh ealain a bhios nam pàirt den Fhèis cuideachd.

Tha daoine ris an còrdadh obair saor-thoileach aig an Fhèis air am fiathachadh an cuid ùidh a nochdadh, cho math ri daoine aig a bheil àite no ionad, - an dà chuid a-staigh no air a’ bhlàr a-muigh - a bhiodh deònach a chur gu feum mar phàirt den fhèis.

’S e tachartas bliadhnail leis a’ choimhearsnachd a th’ ann am Fèis Fiadh-bheatha nan Eilean airson dualchas nàdarra ’s cultarach nan Eilean Siar a chomharrachadh. Thèid a’ phrìomh fhèis a chumail bhon 20mh dhan 27mh dhen Ògmhios 2026 agus leanaidh Iomall na Fèise fad an Iuchair.

Gach bliadhna bidh buidhnean ionadail ’s daoine fa leth a’ cur air dòigh measgachadh de thachartasan air feadh nan eilean, a’ toirt cothrom do mhuinntir an àite ’s luchd-tadhail le chèile eòlas a chur air sàr fhiadh-bheatha nan Eilean Siar ’s ceanglaichean ùra a thogail rithe.

Am measg nan tachartasan a bh’ aig an fhèis sna bliadhnaichean mu dheireadh: cuairtean-iùil (sa Bheurla ’s sa Ghàidhlig); tursan mara; safariathan snorgalaidh, surfaidh ’s SUP; ‘shorewatches’; bùthan-obrach cruthachail; trèanadh air saidheans nan saoranach; taisbeanaidhean ealain; bùthan-obrach air togail dhealbhan de bheathaichean; còmhraidhean le eòlaichean, agus gu leòr eile. 

Thathar ag iarraidh cuideachadh bho mhuinntir an àite airson fèis na bliadhna-sa a dhèanamh cho math ’s a ghabhas, le bhith a’ cur thachartasan air dòigh, a’ cur an cuid obair-ealain air adhart airson fear de Thaisbeanaidhean Ealain na Fèise (aonan ann an Uibhist a Tuath ’s am fear eile ann an Leòdhas), no ag obair gu saor-thoileach aig an Fhèis.

Thuirt Co-òrdanaiche na Fèise, Sharon Nic a’ Phearsain: “Tha an tachartas sònraichte seo leis a’ choimhearsnachd na chothrom dhuinn uile beartas na beatha an seo a chomharrachadh – an fhiadh-bheatha, na cruthan-tìre ’s an cultar. Tha e cuideachd na theans dhuinn meòrachadh air cho cugallach ’s a tha na siostaman seo, agus cho cudromach ’s a tha e gun obraich sinn còmhla ri chèile airson coimhead às an dèidh ’s an dìon.

Coltach ri bliadhnaichean eile, tha sinn an dòchas gum bi prògram loma-làn thachartasan aig fèis 2026, agus tha fàilte bhlàth ro dhaoine fa leth, buidhnean coimhearsnachd ’s gnìomhachasan ionadail a thighinn an sàs le bhith a’ cur an tachartais aca fhèin air dòigh! Cuideachd tha daoine aig a bheil àite no ionad - an dà chuid a-staigh no air a’ bhlàr a-muigh - ’s a bhiodh deònach a chur gu feum mar phàirt den fhèis air am fiathachadh fios a chur thugainn.”

Thuirt Katy Malone, a chaidh gu tachartasan agus a chuir cuid eile air dòigh aig fèis na bliadhna an-uiridh: “Chaidh mi gu dà de na cuairtean ann am Barraigh an-uiridh agus bha iad le chèile mìorbhaileach agus cha tèid iad air dìochuimhne. Bha e sgoinneil a bhith ag ionnsachadh mun chultar ’s an fhiadh-bheatha bho eòlaichean a tha a’ fuireach ’s ag obair sna h-eileanan. Bha e doirbh roghnachadh dè dhèanainn ’s an leithid de dhiofar thachartasan a’ dol!”

Thuirt Holly Nash, neach-ealain a tha a’ fuireach ann an Leòdhas: “Tha mi uabhasach dèidheil air an taisbeanadh ealain aig Fèis Fiadh-bheatha nan Eilean oir tha e a’ comharrachadh bòidheachd ’s iongantas an nàdair sna h-eileanan mìorbhaileach againn. Tha rud sam bith a tharraingeas aire dhan àrainneachd nàdarra againn a’ faireachdainn gu math cudromach, gu sònraichte leis a’ chunnart an cois atharrachadh na gnàth-shìde ’s buaidh mic an duine air eag-shiostaman cugallach. Faodaidh sinn ar dòighean-smaoineachaidh mu fhiadh-bheatha a chnuasachadh às ùr ’s sinn a’ cruthachadh ealain a th’ air a bonntachadh ann an nàdar, agus faodaidh i brosnachadh a thoirt do choimhearsnachdan barrachd a dhèanamh gus an nàdar a dhìon. B’ e seo a’ chiad thaisbeanadh agam nam neach-ealain o chionn dà bhliadhna agus tha mi glè thaingeil airson a’ chothruim ud.”

Tha barrachd fiosrachaidh do dhaoine aig a bheil ùidh ann an cuideachadh aig Fèis na bliadhna-sa aig: https://www.outerhebrideswildlifefestival.co.uk/get-involved, no faodaidh iad fios a chur gu: sharon.macpherson@bumblebeeconservation.org  

’S e meadhan-oidhche air 6 Giblean 2026 an ceann-latha airson tachartasan a chlàradh ’s ùidh a nochdadh sna taisbeanaidhean ealain.