26 May, 2026
Seo dhut prògram Fèis Fiadh-bheatha nan Eilean 2026 – tursan bàta, cuairtean fiadh-bheatha, bùthan-obrach cruthachail is mòran a bharrachd!
Tha am prògram againn a-nis airson Fèis Fiadh-bheatha nan Eilean as t-samhradh, le 80 tachartasan leis a’ choimhearsnachd a chomharraicheas fiadh-bheatha, tìr is dualchas cultarach nan Eilean Siar.
Bidh prìomh sheachdain na Fèise eadar an 20mh is 27mh dhen Ògmhios ach cumaidh Iomall na Fèise a’ dol gu deireadh an Iuchair.
Tha prògram na bliadhna deas ri làimh a-nis agus loma-làn de thachartasan – an-asgaidh ’s air airgead – air feadh nan eilean. Tha iad a’ gabhail a-staigh na leanas: taisbeanaidhean ealain; sgioblachadh thràighean leis a’ choimhearsnachd; tursan bàta; seiseanan bàrdachd, ciùil is sgeulachdan; taisbeanadh fhilmichean; bùthan-obrach aithneachadh is suirbhidhean fiadh-bheatha; sgrìoban ialtagan air an fheasgar; sgrìoban nàdair le treòir ann an Gàidhlig is Beurla; clasaichean yoga a-muigh; taisbeanaidhean eachdraidh is cultair; bùthan-obrach ealain is làmh-cheàrdan; cèilidhean is fiù seisean blasadh sineubhair (le cudrom air na biastagan a ghiùlaineas am poilean oir cha bhiodh na luibhean ud againn às an aonais)!
’S e am prògram glèidhteachais Gnèithean air an Oir a tha a’ stiùireadh na fèise agus air a maoineachadh le Maoin-dualchais a’ Chrannchuir Nàiseanta ann an co-obrachadh le buidhnean coimhearsnachd ionadail, gnìomhachasan is carthannasan glèidhteachais. Tha an fhèis airson cothrom a thoirt do mhuinntir an àite agus aoighean fiadh-bheatha, tìr is dualchas cultarach nan eilean seo a rùrachadh agus a dhol an sàs ann air dòigh ùr is spòrsail a bhuineas dhan àite fhèin.
Thuirt Sharon Nic a’ Phearsain, Co-òrdanaiche na Fèise: “Tha e cho math gu bheil uiread a dhaoine a’ cur air chois tachartasan am bliadhna aig Fèis Fiadh-bheatha nan Eilean. Gun teagamh sam bith bidh fèis air leth againn a chomharraicheas fiadh-bheatha is bòidhchead nàdarra nan eilean agus tha sin gar fàgail air bhioran.
Eadar eòin-mhara agus beathaichean na mara, bhith-àrainnean na machrach is a’ chladaich, bidh cothroman air leth aig fèis na bliadhna-sa a sheallas do dhaoine dè cho sònraichte ’s a tha nàdar nan Eilean Siar. Tha sinn a’ dèanamh fiughair ris a h-uile duine a tha a’ fuireach an seo no a’ dol a thadhal air an fhèis mhìorbhaileach seo a chomharraicheas nàdar air feadh nan Eilean Siar!”
Thuirt Moira NicDhòmhnaill on Lanntair: “Aig an Lanntair, tha sinn a’ dèanamh fiughair ri Fèis Fiadh-bheatha nan Eilean is sinne a’ gabhail pàirt a-rithist ann an 2026. Sna beagan bhliadhnaichean seo chaidh, chùm sinn bùthan-obrach ealain dhan chlann mun t-seillean-mhòr bhuidhe, ialtagan is eòin-mhara – cuid dhe na beathaichean as annasaiche a chomharraicheas an fhèis seo. Agus as t-samhradh bidh bùthan-obrach againn mu leòmainn is dealanan-dè – inneal brosnachail airson foghlam gluasaid, ciùil agus ealain lèirsinneach. Tha Fèis Fiadh-bheatha nan Eilean a’ toirt cruinn àireamh cho mòr de thachartasan nàdair a tha fosgailte dhan a h-uile duine agus tha sinn a’ dèanamh fiughair ri prògram na bliadhna-sa.” Faic am prògram slàn aig Fèis Fiadh-bheatha nan Eilean air làrach-lìn na fèise: www.outerhebrideswildlifefestival.co.uk
Contact information
- Name
- Eilidh Ross
- eilidh.ross@nature.scot
Notes to editors
Available in English here: https://speciesontheedge.co.uk/the-outer-hebrides-wildlife-festival-2026-programme-is-here-boat-tours-wildlife-walks-creative-workshops-and-more/
’S e fèis coimhearsnachd bhliadhnail a th’ ann am Fèis Fiadh-bheatha nan Eilean fo stiùir Urras Glèidhteachas nan Seilleanan-mòra mar phàirt de Ghnèithean air an Oir.
Tha iomadh com-pàirtiche an sàs ann am prògram glèidhteachais Gnèithean air an Oir is ann an co-bhonn ri coimhearsnachdan tha e a’ cur roimhe teachd-shaoghal nas fheàrr a chruthachadh do dh’fhiadh-bheatha a tha fo chunnart air cladach is eileanan na h-Alba.
Le maoineachadh o Mhaoin Dualchais a’ Chrannchuir Nàiseanta, tha Glèidhteachas nam Muir-thìreach is nan Snàigeach, Urras Glèidhteachas nan Ialtagan, Buglife, Urras Glèidhteachas nan Seilleanan-mòra, Glèidhteachas nan Dealan-dè, NàdarAlba, Plantlife, agus RSPB na h-Alba anns a’ chom-pàirteachas. Tha am prògram a’ dol ann an seachd sgìrean ann an Alba: Earra-Ghàidheal is na h-Eileanan A-Staigh; Innse Gall; An Costa a Tuath; Arcaibh; Sealtainn; An Costa an Ear; Linne Shalmhaigh.
NatureScot is Scotland's nature agency. We work to enhance our natural environment in Scotland and inspire everyone to care more about it. Our priority is a nature-rich future for Scotland and an effective response to the climate emergency. For more information, visit our website at www.nature.scot or follow us on X at https://x.com/NatureScot
’S e NatureScot buidheann nàdair na h-Alba. Bidh sinn a’ neartachadh àrainneachd na h-Alba agus a’ brosnachadh dhaoine gu barrachd suim a chur ann an nàdar. Tha e mar phrìomhachas againn gum bi nàdar na h-Alba beairteach agus gun dèilig sinn gu h-èifeachdach le èiginn na gnàth-shìde. Tha an tuilleadh fiosrachaidh aig www.nature.scot no air X aig https://x.com/NatureScot
