Luchd-ealain ionadail gan sireadh airson taisbeanaidhean ealain aig Fèis Fiadh-bheatha nan Eilean

’S e tachartas bliadhnail leis a’ choimhearsnachd a th’ ann am Fèis Fiadh-bheatha nan Eilean (OHWF) a chomharraicheas fiadh-bheatha mhìorbhaileach nan Eilean Siar. Thèid a’ phrìomh fhèis a chumail eadar 21^mh is 28^mh dhen Ògmhios am bliadhna ach leanaidh grunn thachartasan orra tron Iuchar mar phàirt de dh’Iomall Fèis OHWF.   

Bidh dà thaisbeanadh ealain na phàirt dhen fhèis am bliadhna; aonan ann an Cafaidh an Lanntair, Steòrnabhagh, eadar 7^mh is 28^mh dhen Ògmhios agus fear eile ann an Cafaidh Taigh Chearsabhagh, Uibhist a Tuath eadar an 7^mh dhen Ògmhios gun 26^mh dhen Iuchar.

Tha fàilte ro thàirngean, peantaidhean, priontaichean is dealbhan camara a tha co-cheangailte ri nàdar, fiadh-bheatha no cuspairean àrainneachdail sna h-Eileanan Siar sna tagraidhean dhan taisbeanadh. A ghnàth, tha sinn a’ sireadh obair-ealain nach eil nas motha na A3 agus a tha deiseil ri crochadh. 

Ma tha ùidh aig cuideigin an obair-ealain aca a chur ann an taisbeanadh no san dà thaisbeanadh, tha fàilte ro thagraidhean ron 16^mh dhen Chèitean tro làrach-lìn na fèise, www.outerhebrideswildlifefestival.co.uk/exhibit-your-art, no le bhith a’ cur post-d gu Màiri, Co-òrdanaiche na Fèise, air mairi.carrey@bumblebeeconservation.org. Feumaidh gach tagraiche an ainm, fiosrachadh conaltraidh is an làmhrachan aca sna meadhanan sòisealta no air làraichean-lìn a thoirt seachad, dealbh dhen obair-ealain a tha iad a’ cur san tagradh, dè cho mòr ’s a tha i, dè a’ phrìs (ma bhios i ri ceannach) agus tuairisgeul goirid air a’ cheangal eadar am pìos is nàdar nan Eilean an Iar. 

Thuir Cally Yeatman, neach-ealain a tha stèidhichte sna h-Eileanan Siar is a ghabh pàirt san taisbeanadh ealain an-uiridh: “Tha an fhiadh-bheatha a tha ceithir-thimcheall oirnn sna h-Eileanan Siar gach latha aig teis-meadhan m’ obrach mar neach-ealain an-seo, eadar bàirneach is eòin-mhara ’s iolairean, feamainn is crotal nan creagan. Tha e cho math cothrom a bhith againn an àrainneachd bheartach seo a thaisbeanadh do chàch”. 

Thuirt Màiri Carrey, Co-òrdanaiche na Fèise: “Ged is e iteal nan eun-mara no nan iolairean-buidhe a th’ ann, gaoir-theas air a’ mhachair fo bhlàth, falbh is tilleadh a’ mhuir-làin, gairm nan traon no a’ bheatha fo na tuinn, tha brosnachadh gun chrìoch ann an nàdar nan Eilean Siar. Chan eil e gu diofar a bheil do chuid obrach a’ toirt sùil air blàr nan siantan, mion-sheallaidhean fiadh-bheatha nan eilean no na ceanglaichean domhain eadar daoine ’s nàdar, mholamaid dhut pàirt a ghabhail le do chuid obrach-ealain a chomharrachadh ar bith-iomadachd annasach is a’ sealltainn do chàch carson a tha ar n-eileanan cho sònraichte.”

’S e Gnèithean air an Oir a tha a’ stiùireadh Fèis Fiadh-bheatha nan Eilean, prògram glèidhteachais le iomadh com-pàirtiche ’s a tha ag obair le coimhearsnachdan air feadh na h-Alba airson aire dhaoine a tharraing dha na gnèithean as ainneimhe againn a tha sa chunnart as motha air cladaichean is eileanan na h-Alba agus airson ’s gum bi iad againn fhathast san àm ri teachd. Tha prògram farsaing de thachartasan is gnìomhachdan aig an fhèis air feadh nan eilean agus tha sin a’ toirt cothrom an dà chuid do mhuinntir an àite is luchd-tadhail fiadh-bheatha dho-chreidsinneach nan Eilean Siar a rùrachadh, fhaicinn is a chluinntinn, a’ chiad turas no às ùr. 

Tha iomadh rud air a bhith againn gu ruige seo, eadar siubhal le treòraiche, tursan bàta, tursan snorcalaidh is surfaidh, amharc cladaich, bùthan-obrach sgrìobhadh nàdair, trèanadh ann an suirbhidhean air mamalan-mara, bùthan-obrach Gàidhlig, taisbeanaidhean ealain, bùthan-obrach togail dhealbhan, siubhal ialtagan aig laighe na grèine is mòran eile. ’S e buidhnean is muinntir an àite a chuireas air chois gach tachartas. Ma tha thu airson tachartas a chur air chois aig fèis na bliadhna, is urrainn dhut a chlàradh a-nis air làrach-lìn na fèise: https://www.outerhebrideswildlifefestival.co.uk/host-an-event. 

Ma tha ceist sam bith agan mun fhèis no mu na taisbeanaidhean ealain, cuir fios thugainn tro làrach-lìn na fèis no cuir post-d gu: mairi.carrey@bumblebeeconservation.org.