Thathar a’ moladh do dhaoine a thadhlas air beanntan na h-Alba plana a chur air dòigh ’s àm stalcaireachd fèidh a’ teannadh dlùth

Tha seirbheis A’ dèanamh air Beanntan na h-Alba na pàirt de làrach-lìn Còd Slighean Dùthchail na h-Alba agus innsidh i do dhaoine càit a bheilear ri stalcaireachd fèidh mus tèid iad a-mach. Cuide ri goireasan eile mar Walkhighlands agus làraich-lìn nan oighreachdan, innsidh an t-seirbheis seo dhut cuin is càit am bithear ri stalcaireachd air beanntan air an tadhail daoine gu tric agus innsidh I dhut cò ris a bhruidhneas tu airson barrachd fiosrachaidh agus dè na slighean a tha ‘sàbhailte an-còmhnaidh’.

Tha stiùireadh nam fiadh uabhasach cudromach ann an Alba airson aghaidh a thoirt air èiginn an nàdair is na gnàth-shìde. Ma thèid againn air buaidh nam fiadh - leithid ionaltradh agus saltairt thar a’ chòir - a lùghdachadh, bheir sin cothrom ath-shlànachaidh dhan talamh àrd a bhios an uair sin nas ioma-nàdarraiche agus a ghlacas barrachd carboin.

’S e deagh àm a th’ ann fàs cleachdte ri seirbheis A’ dèanamh air Beanntan na h-Alba a chur gu feum gu cunbhalach, ’s stalcaireachd daimh mar as trice a’ dol am meud as t-fhoghar. ’S iad na trì ciad sheachdainean san Dàmhair a tha as trainge a thaobh ràith stalcaireachd daimh, agus na seachdainean mu dheireadh ann an ràith nan eilidean (a mhaireas bho 21 Dàmhair gu 15 Gearran) a tha as trainge a thaobh nan eilid. Tha e gu sònraichte cudromach cùram a ghabhail aig na h-amannan seo.

Mothaichidh fèidh daoine a tha deagh astar air falbh bhuapa, gu tric fada air thoiseach air an neach-coiseachd a’ toirt an aire dhaibh-san. Dh’fhaodadh do dhaoine a thadhlas air na beanntan, fiù ’s le deagh rùn, briseadh a-steach air stalcaireachd gun fhiosta dhaibh. Nì ceumannan sìmplidh diofar mòr – leithid a bhith a’ planadh slighe a sheachnaicheas àiteachan far a bheil stalcaireachd a’ dol, a bhith toilichte planaichean atharrachadh air an latha agus deònach iarrtasan reusanta bho mhanaidsearan fearainn a leantainn. ’S fhiach a bhith mothachail cuideachd nach bi stalcaireachd a’ toirt buaidh air uiread de shlighean Disathairne, agus chan àbhaist i a bhith a’ dol idir Didòmhnaich.

Thuirt Ali Tait, Oifigear Dhaoine ’s Àiteachan - Stiùireadh Inntrigidh ’s Tadhail aig NàdarAlba:

“Anns a’ bhliadhna mu dheireadh, tha còrr ’s 4600 duine air duilleagan-lìn A’ dèanamh air Beanntan na h-Alba a chleachdadh – leis a’ chuid as motha dhiubh a’ tighinn aig an àm as trainge as t-fhoghar. Tha an t-seirbheis seo a’ cumail ri Còd Slighean Dùthchail na h-Alba ’s a’ leigeil le daoine planaichean a chur air dòigh a lùghdaicheas a’ chunnairt gum briseadh iad a-steach air stalcaireachd. Tha an t-seirbheis a’ dol am meud, agus mholamaid do dh’uachdaranan ’s manaidsearan fearainn pàirt a ghabhail ann mur h-eil iad air sin a dhèanamh fhathast.”

Thuirt Catriona Davies, Oifigear Inntrigidh & Glèidhteachais aig Sreapadaireachd Alba:

“’S e àm air leth math a th’ anns an fhoghar dèanamh air na beanntan agus, leis an uallach a th’ oirnn a thaobh inntrigidh, feumaidh sinn a bhith mothachail gu bheil e cuideachd na àm cudromach do stiùireadh nam fiadh. ’S e goireas feumail a th’ ann an A’ dèanamh air Beanntan na h-Alba a leigeas leinn na slighean againn a chur air dòigh airson ’s nach bris sinn a-steach air stalcaireachd fèidh, ach aig an aon àm nach caill sinn cothrom air cruthan-tìre beanntach brèagha. Tha sinn a’ moladh do luchd-coiseachd, ruitheadairean ’s sreapadairean uile sùil a thoirt air A’ dèanamh air Beanntan na h-Alba mus fhalbh iad a-mach.”

Thuirt Tom Turnbull, Cathraiche Comann Bhuidhnean Stiùireadh nam Fiadh:

“Tha barrachd cudroim a’ tighinn air manaidsearan fèidh àireamh nam fiadh a lùghdachadh a rèir amasan Achd na h-Àrainneachd Nàdarra (Alba) 2026. Tha seirbheis A’ dèanamh air Beanntan na h-Alba na goireas riatanach a leigeas le manaidsearan fèidh na targaidean dhan ghnàth-shìde ’s bith-iomadachd a choileanadh. Tha sinn an comain dhaoine a leanas na soidhnichean ’s a’ chomhairle a thaobh inntrigidh, agus a tha, mar thoradh, a’ lùghdachadh na buaidh aig an àm chudromach seo den bhliadhna.”

Chaidh seirbheis A’ dèanamh air Beanntan na h-Alba a chur air bhog ann an 2015 agus gheibhear i aig www.outdooraccess-scotland.scot/hftsh. Faodaidh uachdaranan ’s manaidsearan fearainn pàirt a ghabhail san t-seirbheis le bhith a’ cur post-d gu HFTSH@Nature.scot airson barrachd fiosrachaidh.